José Domínguez Guizán

Vilalbés. Funda o Belén en 1972. Párroco de Begonte ata o seu pasamento o 25 de abril de 1986. En xaneiro de 1981, déuselle o seu nome ao Centro cultural que promove o Belén. En Begonte desenvolveu un importantísimo labor de promoción social e cultural, impulsando importantes obras e deixando unha inesquecible lembranza en todos os que o coñeceron.

Jesús Dominguez Guizán

Vilalbés. Crego como seu irmán, sucedeu a este en 1986 como párroco begontino e como Presidente do Centro Cultural que impulsa o Belén. Se ata daquela estivo nun segundo plano, soubo tomar exemplarmente o testigo deixado polo fundador. Nesta etapa potenciou a acción cultural arredor do Belén, creouse o Museo do Belén, cada ano edítase unha publicación cos traballos premiados en xornalismo e poesía, e impulsouse de xeito definitivo o conxunto de accións que conforman O Nadal de Begonte.

José Rodríguez Varela

Begontino. Especialmente dotado para as manualidades e cunha especial dedicación ao seu pobo, á súa familia e ao Belén, xunto con “Don José” creou este singular Belén, renovouno e coidouno ata o seu pasamento en 2010. Ese mesmo ano, en atención ao especial traballo a prol do seu pobo, o Concello nomeouno Fillo Predilecto de Begonte. En 1978 foi nomeado “Socio de honra” do Belén; en 1982, “Belenista de honra”, e tra-lo seu pasamento, o Museo do Belén chámase, na sua honra, “Museo José Rodríguez Varela”.

José Luis Hernangómez Sastre

Segoviano, adoita indicar que é “un lucense que naceu en Segovia”. Foi nos anos setenta do pasado século Delegado Provincial de Información e Turismo en Lugo, tendo prestado especial apoio ao Belén e as súas iniciativas. En 1977 foi nomeado Presidente de Honra, e desde entón todos os anos está en Begonte nas datas máis sinaladas do Belén e as súas actividades culturais.

Pilar Gómez García

Monterrosina de nacemento, begontina por vínculos familiares e pola devoción polo Belén creado polo seu home, José Rodríguez Varela. Desde o primeiro momento colaborou dun xeito total no Belén electrónico. Foi nomeada “Socia de honra” e “Señora do Belén” en 1982.

Pilar, a "Señora do Belén de Begonte"

María José Cruz Veiga (Teté)

Destacada colaboradora do Belén desde moi nena, foi nomeada “Socia de honra” en 1982. Un desgraciado accidente puxo fin á súa vida en setembro de 1991. A súa memoria perdura entre toda a gran familia do Belén de Begonte.